Yocheved Lifschitz, një grua 85-vjeçare, është liruar mbrëmë nga grupi Hamasi në Gazë, pasi ishte marrë peng që nga 7 tetori.
Pamjet nga momenti i lirimit tregojnë emocionet dhe shtrëngimin e dorës me një të armatosur të Hamasit, një moment që po shpërndahet gjerësisht në mediat sociale.
Familjarët e saj janë të kënaqur me lirimin e saj, ndërsa vajza e saj, Sharone, ka bërë një koment për BBC-në, duke thënë se “shtrëngimi i dorës” është karakteristik për vullnetin dhe rezistencën e madhe të nënës së saj.
“Është kështu ajo”, ka theksuar Sharone.
Në konferencën për shtyp ajo ka thënë se ishte rrëmbyer nga shtëpia e saj, e rrahur me shkopinj dhe u mbajt në tunele nën Gaza për dy javë, përpara se të lirohej mbrëmë.
Sharone ka thënë gjithashtu se nëna e saj kishte parë një “rrjet të madh” tunelesh nëntokësore të drejtuara nga Hamasi, të cilin ajo e krahasoi me “rrjetën e merimangës”.
Vetë Lifschitz ka vazhduar të përshkruante kushte të pastra dhe roje që kujdeseshin për “çdo detaj”.
“Ata u ushqyen me djathë të bardhë dhe kastravec – të njëjtin ushqim si rrëmbyesit”.
Qeveria e Izraelit njoftoi të hënën vonë se Nurit Cooper, 79 vjeçe dhe Yocheved Lifshitz, 85 vjeçe, u liruan “nga duart e organizatës terroriste, Hamas”.
Lifshitz dhe Cooper u dërguan në pikëkalimin kufitar me Egjiptin, Rafah, nga ku u morën me ambulanca, sipas pamjeve të shfaqura nga televizioni egjiptian.
Ato, bashkë me bashkëshortët e tyre, të moshës 83 dhe 84 vjeçe, u rrëmbyen nga shtëpitë e veta në qytetin afër kufirit me Gazën, Nir Oz, nga militantët e Hamasit gjatë sulmit të tërbuar të 7 tetorit.
Raportohet se Hamasi nuk ka marrë asgjë në këmbim për lirimin e dy pengjeve, të cilat u lanë të lira pak ditë pasi Hamasi i kishte liruar një grua amerikane me të bijën.
Hamasi dhe grupet e tjera militante në Gaza besohet i rrëmbyen rreth 220 njerëz, përfshirë një numër të pakonfirmuar të të huajve dhe të personave me dyshtetësi.