Qindra zjarrfikës në Spanjë vazhdojnë të luftojnë me vatrat e mbetura të zjarrit në juglindje të vendit, pas një prej zjarreve më të rënda në historinë e Spanjës.
Shërbimet e emergjencës janë dislokuar në zonën përreth fshatit Bedar, ku deri tani kanë humbur jetën 12 persona. Sipas autoriteteve spanjolle, mes viktimave janë edhe katër shtetas britanikë. Ndërkohë, 23 persona të tjerë rezultojnë ende të zhdukur.
Zyrtarët lokalë në zonën e Los Gallardos kanë paralajmëruar se numri i viktimave mund të rritet, pasi ekzistojnë frikëra se mes të vdekurve mund të ketë edhe shtetas të tjerë britanikë.
Një valë e zgjatur të nxehti, me temperatura që kanë arritur rreth 40 gradë Celsius, ka nxitur përhapjen e zjarreve në të gjithë Evropën Jugore këtë verë, veçanërisht në Francë, Portugali dhe Spanjë.
Temperaturat e larta, toka jashtëzakonisht e thatë dhe erërat e forta bënë që zjarri në Los Gallardos të përhapej me shpejtësi të enjten pasdite.
Shkaku i zjarrit fillimisht iu atribua një linje të rrëzuar të energjisë elektrike, por kompanitë lokale të furnizimit me energji kanë mohuar se kjo ishte arsyeja e shpërthimit të flakëve.
Autoritetet nuk kanë dhënë detaje shtesë për katër personat që u gjetën të vdekur brenda një makine të djegur.
Dega andaluziane e agjencisë kombëtare të motit AEMET bëri të ditur se kushtet meteorologjike pritet të jenë “dukshëm më të favorshme” të shtunën, me erëra më të moderuara dhe temperatura më të ulëta.
Me të paktën 12 viktima, ky zjarr konsiderohet tashmë një nga më vdekjeprurësit në historinë e Spanjës.
Në vitin 1984, 20 persona humbën jetën në një zjarr në ishullin La Gomera të Ishujve Kanarie, ndërsa në vitin 1979, 21 persona, mes tyre nëntë fëmijë, vdiqën në një zjarr pyjor pranë Lloret de Mar, në verilindje të Spanjës.
Ndryshimet klimatike po rrisin temperaturat në mbarë botën, ndërsa Evropa mbetet kontinenti që po ngrohet më shpejt, me një ritëm dy herë më të lartë se mesatarja globale, sipas shërbimit klimatik Copernicus.