Entuziazmi vërehet në fytyrat e tyre.
Për ta është një ditë e rëndësishme sepse pas tre muajsh pushim, i janë kthyer rutinës së mësimeve e shoqërisë me njëri-tjetrin.
Klasa e shokët nuk kishin ndryshuar, por një shtatori sivjetmë i gjeti nxënësit kosovarë me një formë të re të furnizimit me libra.
Arsa Maloku, nxënëse e klasës së tetë në shkollë n “Xhemajl Mustafa” të Prishtinës e hudhi në pah një problematikë.
“Paret e ministrisë i kam shfrytëzu me ble libra, fletore pune. Neve librat që na ka dhanë shkolla janë krejt në rregull por problemi është që janë të dëmtume dhe nuk munden me u përdorë”, ka thënë ajo.
Kritika për formën e subvencionimit të librave kanë edhe prindërit e nxënësve nga klasa e parë deri në të pestën.
“Mu personalisht nuk më ka bërë shumë problem sepse jam këtu qytetare por po mendoj për nanat që janë pak larg edhe janë në vende rurale, për ta duhet me qenë shumë vështirë, sidomos dikush mundet mos me pas qasje në internet”, ka thënë Learta Kelmendi.
Ankesat, prindërit i kanë adresuar edhe në drejtori të shkollës.
“Kemi pasur, sidomos ditën e djeshme telefonata, komunikime ne grupin e shkollës rreth problematikës që nuk po kanë mundësi me u furnizu me libra, por ne si shkollë kemi gjetë modalitete që në fillim të mos ketë probleme”, ka thënë shpresa Shala.
Pavarësisht ankesave, nxënësit e prindërit janë uruar nga Ministrja e Arsimit, Arbërie Nagavci.
Urime u ka dërguar nxënësve në fillimin e kapitullit të ri edhe presidentja Vjosa Osmani. Ajo theksoi se arsimimi nuk ka të bëjë vetëm me libra dhe teste, por me kultivimin e ndjeshmërisë, të menduarit kritik dhe kreativitetin.
Ndërsa kryeministri Albin Kurti, duke përmendur librat dhe punët që sipas tij i ka bërë Qeveria, thotë se me punë e përkushtim do të realizojnë synimin për arsim cilësor.