Ministri i Shëndetësisë, Arben Vitia, ka ngushëlluar për vdekjen e infermieres Fitore Zenelaj, duke thënë se ajo do të mbesë frymëzim se si të luftohet për ata që përballen me kancer.
Ai tha se ajo do të mbahet mend e do të respektohet gjithmonë.
“Gjallëria, entuziazmi e dashamirësia që rrezatonte Fitorja do të mungojnë në jetët e të gjithë atyre që patën rastin të punojnë me të, të trajtohen nga ajo dhe ata që e kishin pranë në jetën e tyre”, ka shkruar Vitia.
Fitore Zenelaj është përballur për disa vite me sëmundjen e kancerit dhe ka qenë një nga zërat më të fuqishëm për vetëdijesimin mbi luftën ndaj kësaj sëmundjeje. Ajo ka lënë pas vetes bashkëshortin dhe tri vajzat.