Raportuesja për Kosovën në Parlamentin Evropian, Viola von Cramon, ka takuar drejtuesen e Sekretariatit Ndërkombëtar të organizatës Evropa Nostra, Sneška Quaedvlieg-Mihailovic, me të cilën ka biseduar për Manastirin e Deçanit.
Sneška Quaedvlieg-Mihailovic ka qenë pjesë e delegacionit të kësaj organizate, i cili ka vizituar Kosovën javën e kaluar, duke insistuar që Manastiri i Deçanit duhet të jetë nën mbikëqyrje 24 orë nga KFOR-i.
Von Cramon ka thënë se ka pasur takim të hapur dhe produktiv me Sekretaren e Përgjithshme të Europa Nostra-s, me fokus të veçantë në Manastirin e Deçanit.
Open and productive meeting with the SecGen of @europanostra about the need to improve the protection of endangered #CulturalHeritage throughout #Europe, with the particular focus on @DecaniMonastery and destroyed cultural heritage in Ukraine 🇺🇦. pic.twitter.com/3jWJ0hroiq
— Viola von Cramon (@ViolavonCramon) July 14, 2022
“Takim i hapur dhe produktiv me Sekretaren Gjenerale të Europa Nostra, mbi nevojën për të përmirësuar mbrojtjen e trashëgimisë kulturore të rrezikuar në Evropë, me fokus të veçantë në Manastirin e Deçanit dhe trashëgiminë kulturore të shkatërruar në Ukrainë”, ka thënë Von Cramon.
Delegacioni i organizatës që merret me trashëgiminë kulturore në Evropë, Evropa Nostra, e ka listuar Manastirin e Deçanit në 7 monumentet më të rrezikuara në Evropë për vitin 2021.
Këtë e kanë kundërshtuar institucionet e Kosovës, me arsyetimin se në asnjë rrethanë Manastiri i Deçanit nuk është i rrezikuar.
Por, Evropa Nostra, pas përfundimit të vizitës kanë lëshuar një komunikatë ku kanë insistuar që objekti fetar ortodoks i shekullit të 14-të të ruhet 24/7 nga trupat e KFOR-it.
“Për shkak të sfidave komplekse të sigurisë, Manastiri duhet të vazhdojë të ruhet 24/7 nga trupat e KFOR-it, siç ka konfirmuar edhe komandanti i KFOR-it. Manastiri i Deçanit herë pas here ballafaqohet edhe me përpjekje të pabaza për të rishikuar identitetin kulturor dhe historik të këtij objekti të trashëgimisë fetare, tendencë e cila nuk është në përputhje me parimet evropiane dhe ndërkombëtare të interpretimit të saktë historik dhe artistik të monumenteve historike dhe objekteve të trashëgimisë”, thuhet në komunikatën e Europa Nostra.