Policia ka kryer kontrolle këtë të enjte në zonën e Kakarriqit në Lezhë, ku nga uniformat blu mësohet se u gjet motori me të cilin u largua disa ditë më parë në Shëngjin ekzekutori i biznesmenit Ardian Nikulaj.
Forcat e policisë RENEA ndodhen në vendngjarje dhe kanë bërë të mundur gjetjen e mjetit me të cilin është larguar vrasësi.
Motoçikleta është gjetur në ujërat e një përroi në fshatin Kakarriq, pranë banesës së shtetasit në kërkim Edmond Haxhia.
“Si rezultat i hetimeve, informacioneve të siguruara dhe kontrolleve të imtësishme në terren të kryera nga shërbimet e Drejtorisë Vendore të Policisë Lezhë dhe forcat operacionale të Policisë së Shtetit, në afërsi të banesës së shtetasit të shpallur në kërkim E. H., në fshatin Kakarriq, shërbimet e Policisë gjetën dhe sekuestruan motomjetin e përdorur nga ekzekutori, për vrasjen e shtetasit Ardian Nikulaj”, thuhet në njoftimin e policisë.
Sipas njoftimit, grupi hetimor i posaçëm është duke vijuar hetimet dhe veprimet në terren, për dokumentimin e plotë ligjor të kësaj ngjarjeje.
Ndërkaq, Policia e Shtetit është duke bashkëpunuar ngushtë me partnerët dhe organet ligjzbatuese ndërkombëtare, për zbardhjen dhe kapjen e 6 shtetasve të shpallur në kërkim në lidhje me vrasjen e 51-vjeçarit Ardian Nikulaj.