Pas raportimeve për vrasjen e një polici serb dhe plagsojen e një polici tjetër, Ministria e Punëve të Jashtme dhe Diasporës ka bërë apel te qytetarët që ta shmangin lëvizjen përmes territorit serb.
Në njoftimin e tyre kërkohet që mërgimtarët dhe qytetarët e Kosovës që të rrisin kujdesin gjatë kalimit nëpër Serbi dhe sipas vlerësimit të situatës ta shmangin lëvizjen përmes territorit serb.
Po ashtu, MPJD ka njoftuar se Zyra Ndërlidhëse në Beograd po ndjek nga afër zhvillimet në lidhje me pretendimet e Ministrit të Brendshëm të Serbisë, Ivica Daçiq për një incident në magjistralen afër Loznicës në Serbi.
“Ministria e Punëve të Jashtme dhe Diasporës, përmes Zyrës Ndërlidhëse në Beograd, po ndjek nga afër zhvillimet në lidhje me pretendimet e ministrit të Brendshëm të Serbisë, Ivica Daçiq për një incident në magjistralen afër Loznicës në Serbi, ku pretendon që ka mbetur i vrarë një polic serb dhe i përfshirë në këtë rast, sipas tij, është një shtetas i Republikës së Kosovës.”
“Ministria e Punëve të Jashtme dhe Diasporës do ta mbajë të informuar opinionin publik për këtë rast dhe apelon te mërgimtarët dhe qytetarët e Kosovës që të rrisin kujdesin gjatë kalimit nëpër Serbi dhe sipas vlerësimit të situatës të shmangin lëvizjen përmes territorit serb,” thuhet në njoftim.