Dy persona janë arrestuar të mërkurën e 31 majit në Fushë-Kosovë, pasi të njëjtit dyshohen se kanë plagosur një person me armë zjarri.
Viktimat kishin kërkuar ndihmë mjekësore në Qendrën Klinike Universitare të Kosovës dhe të njëjtit janë jashtë rrezikut për jetë.
Në raportin 24-orësh të policisë thuhet se me vendim të prokurorit një nga të dyshuarit është dërguar në mbajtje, kurse tjetri është liruar në procedurë të rregullt.
Po ashtu, njoftohet se nga ky rast është konfiskuar një pistoletë dhe dy gëzhoja.
“Dy viktima meshkuj kosovarë kanë kërkuar ndihmë mjekësore në QKUK, pasi që ishin plagosur nga arma e zjarrit. Sipas mjekut, viktimat janë jashtë rrezikut për jetë. Janë arrestuar dy të dyshuar kosovarë dhe është konfiskuar një pistoletë dhe dy gëzhoja. Me vendim të prokurorit, njëri nga të dyshuarit është dërguar në mbajtje, ndërsa tjetri është liruar në procedurë të rregullt”, thuhet në njoftim.
Rasti nga policia është cilësuar si “vrasje në tentativë”.