Vritet në sulmet izraelite ish-shefi i Sigurisë Kombëtare të Iranit Ali Shamkhani
Ish-shefi i Këshillit të Lartë të Sigurisë Kombëtare të Iranit dhe një nga bashkëpunëtorët më të afërt të udhëheqësit suprem, Ayatollah Ali Khamenei, Ali Shamkhani, është vrarë gjatë sulmeve ajrore të ndërmarra nga Izraeli mëngjesin e së premtes, raportojnë mediat shtetërore iraniane. Vdekja e Shamkhanit u konfirmua nga televizioni shtetëror iranian IRINN, duke e cilësuar […]
Ish-shefi i Këshillit të Lartë të Sigurisë Kombëtare të Iranit dhe një nga bashkëpunëtorët më të afërt të udhëheqësit suprem, Ayatollah Ali Khamenei, Ali Shamkhani, është vrarë gjatë sulmeve ajrore të ndërmarra nga Izraeli mëngjesin e së premtes, raportojnë mediat shtetërore iraniane.
Vdekja e Shamkhanit u konfirmua nga televizioni shtetëror iranian IRINN, duke e cilësuar atë si një goditje të rëndë për strukturat strategjike të vendit.
Shamkhani shërbeu si figura kyçe e sigurisë kombëtare për një dekadë – nga viti 2013 deri në 2023 – dhe më herët mbajti poste të larta në Gardën Revolucionare Islamike (IRGC) dhe në Ministrinë e Mbrojtjes. Ai kishte një profil të spikatur edhe në politikën e jashtme, duke përfaqësuar Teheranin në bisedimet e ndërmjetësuara nga Kina me Arabinë Saudite, të cilat çuan në normalizimin historik të marrëdhënieve midis dy vendeve pas viteve të armiqësisë.
Në qarqet diplomatike ndërkombëtare, Shamkhani shihej si një nga figurat më të sofistikuara të diplomacisë iraniane, i njohur për qëndrime të guximshme dhe përfshirje aktive në proceset më të rëndësishme strategjike të vendit, përfshirë edhe negociatat bërthamore me administratën e ish-presidentit amerikan Donald Trump.
Edhe pse u shkarkua në mënyrë të papritur në mesin e vitit 2023, ai mbeti një këshilltar i afërt i Khameneit. Vetëm pak ditë para rifillimit të bisedimeve me SHBA-në në prill, Shamkhani kishte paralajmëruar se Irani mund të dëbonte inspektorët e OKB-së dhe të pezullonte bashkëpunimin me Agjencinë Ndërkombëtare për Energjinë Atomike nëse ndjente kërcënim ndaj sovranitetit të tij.















