Presidenti i Serbisë, Aleksandar Vuçiq, ka treguar se ndaj tij është shtuar presioni ndërkombëtar për zgjidhjen e çështjes së Kosovës. Ai ka thënë se është i gatshëm që t’i mbrojë interesat e Serbisë nëpërmjet dorëheqjes nga posti që mban.
I pyetur në lidhje me spekulimet se ai mund të tërhiqet nga pozita e presidentit, Vuçiq është përgjigjur duke thënë se ai mund ta bëjë këtë si një “lëvizje taktike” për të shpëtuar vendin e tij dhe për ta blerë kohë në afatin kohor prej gjashtë deri në nëntë muaj.
“Unë mund të mendoj për këtë në momentin kur situata është e tillë që duhet të blej kohë për Serbinë, nëse shoh se diçka është e pamundur, megjithëse i afrohem çdo gjëje për të gjetur një zgjidhje”, ka deklaruar Vuçiq.
“Një opsion i tillë në taktikat e zbatuara nga Serbia duhet të ekzistojë dhe mund t’i sjellë vendit gjashtë deri në nëntë muaj,” ka shtuar Vuçiq.
I pari i Serbisë ka thënë se në bisedën e tij me Sekretarin Amerikan të Shtetit, Anthony Blinken, ka dëgjuar për një afat prej disa javësh për zgjidhjen e çështjes mes Kosovës dhe Serbisë. Ky afat kohor, sipas presidentit serb, është joreal, raporton Prva TV.
Vuçiq ka thënë se Serbia po përballet me presion të dyfishtë, sa i përket sanksioneve ndaj Rusisë dhe zgjidhjes për Kosovën dhe se të dyja, sipas tij, shkojnë në bllok.
“Asgjë nuk duhet refuzuar paraprakisht, por me sa shoh, gjithçka është e vështirë për Serbinë, dhe nëse duhet të vendos në këtë moment, nuk na dhanë mundësi” ka përfunduar Vuçiq.