Presidenti i Serbisë, Aleksandër Vuçiq, për vizitën e djeshme të “Pesëshes së Madhe” në Beograd, ka thënë se biseda ishte e vështirë, dhe se sipas tij, qëllimi i tyre është ta njohin pavarësinë e Kosovës.
“Natyrisht, gjithçka për Kosovën është jashtëzakonisht e vështirë për ne. Njerëzit mendojnë se e gjithë kjo është vetëm për shkak të Banjskës, por nuk është. Ajo ishte vetëm taktikisht e tmerrshme për ne dhe ka pasoja të caktuara, por në një kuptim strategjik. Qëllimi i vetëm është ta njohim Kosovën”, ka thënë Vuçiq.
Vuçiq ka thënë se beson që do të arrijnë të gjejnë “një rrugëdalje” dhe se Serbia do të vazhdojë me “suksese të mëdha në ekonomi, ndërtimin e infrastrukturës, duke ruajtur thelbën e interesave të tyre kombëtare”.
“Pikëpamja e tyre është krejtësisht e kundërt me tonën, nuk ka filozofi të madhe”, ka thënë tutje presidenti serb për mediat serbe.
Pësëshja euroamerikane e kryesuar nga emisari special i BE-së në dialogun Kosovë-Serbi, Miroslav Lajçak dhe emisarit të ShBA-së për Ballkanin Perëndimor, Gabriel Escobar, kanë vizituar dje Kosovën dhe Serbinë.