Presidenti i Serbisë, Aleksandar Vuçiq, ka reaguar ndaj deklaratave të ish-ministrit kroat të Mbrojtjes, Anto Kotromanoviç, i cili kishte komentuar për bashkëpunimin ushtarak të Prishtinës dhe Tiranës dhe kishte bërë një vlerësim hipotetik për veprimet e mundshme të Serbisë në rrethana të caktuara gjeopolitike.
Vuçiq u shpreh se deklarata të tilla janë të rëndësishme sepse, sipas tij, tregojnë hapur qëndrimet e palës kroate dhe të atyre që ai i cilëson si mbështetës të “rendit të vendosur jashtë Kombeve të Bashkuara”.
“Është mirë që e dëgjojmë publikisht këtë. Ne nuk kemi treguar asnjë qëllim për të përdorur armë për të kthyer atë që i përket Serbisë, as nuk do ta bënim”, deklaroi Vuçiq.
Ai shtoi se është e rëndësishme, sipas tij, të kuptohen qëllimet e të tjerëve, duke theksuar se disa aktorë janë të gatshëm të përdorin forcën për të mbrojtur “sjellje të paligjshme dhe veprime që bien ndesh me Kartën e Kombeve të Bashkuara”.
Ai nënvizoi se Serbia nuk ka plane për zgjidhje ushtarake dhe nuk synon përdorimin e forcës, por paralajmëroi se është e rëndësishme të kuptohet “qëndrimi real” i vendeve të tjera në rajon.