Presidenti serb, Aleksandër Vuçiq, pas takimit me senatorët amerikanë ka thënë se prioritet i Serbisë është themelimi i Asociacionit të komunave me shumicë serbe në Kosovë, duke theksuar se do të angazhohet në formimin e Asociacionit “siç parashihet me Marrëveshjen e Brukselit”.
Vuçiqi ka takuar senatorët amerikanë, Chris Murphy dhe Gary Peters, të cilët po qëndrojnë në Beograd, në kuadër të një turni njëjavor në shtetet e rajonit të Ballkanit Perëndimor.
“Zhvillova një bisedë të hapur me Chris Murphy dhe Gary Peters, të cilët i falënderova për angazhimin në mbështetjen e dialogut me Prishtinën. Theksova se formimi i Asociacionit të Komunave (me shumicë) Serbe është prioritet, si dhe se ne do të vazhdojmë të insistojmë në implementimin e Asociacionit siç parashihet me Marrëveshjen e Brukselit”, ka shkruar Vuçiq në Instagram.