Kryetari i Degës së PDK-së në Zvicër, Ragip Xhaka, i cili njëherësh është e prindi i yjeve shqiptarë të futbollit, ka reaguar “për ndërhyrjen” që po përpiqet ta bëjë kryeministri, Albin Kurti në zgjedhjet e shtetit zviceran.
Xhaka ka thënë se shqiptarët në Zvicër, përmes punës, kontributit dhe qytetarisë së tyre, ka vite që janë pjesë e rëndësishme dhe përbërëse e këtij shteti.
“Përfshirja e partive politike të Kosovës në zgjedhjet zvicerane, në rastin konkret e Kryeministrit të Kosovës, nuk i shërben kësaj harmonie. Në fakt, kjo ndërhyrje mund të jetë vetëm e dëmshme, duke hutuar mërgatën dhe përçarë opinionin”, ka shkruar Xhaka.
Ai ka shkruar në faqen e Degës së PDK-së në Zvicër se bashkatdhetarët tanë duan dhe duhet të jenë të lirë që të votojnë sipas bindjeve të tyre – pa direktiva të cilat mund të lëndojnë edhe raportet e shkëlqyeshme ndërmjet Kosovës dhe Zvicrës.
“Është e drejtë legjitime dhe e patjetërsueshme, për secilin shqiptar që jeton në Zvicër, që të mbështesë këdo prej kandidatëve nga të gjitha partitë që marrin pjesë në zgjedhje. Është fat i mirë që çdo ditë e më shumë po rritet numri i kandidatëve shqiptarë për poste politike”, ka shtuar Xhaka.
I pari i PDK-së në Zvicër i ka ftuar të gjithë akterët politik në Kosovë që të tregojnë maturi dhe të sillen konform përgjegjësive që u takojnë, sepse animi dhe ndërhyrja e partive politike nga Kosova në zgjedhjet e Zvicrës nuk i shërben interesave te bashkatdhetarëve tanë këtu.