Policia e Zagrebit ka njoftuar se ka ngritur tetë padi në lidhje me incidentin e ndodhur më 7 nëntor përpara Qendrës Kulturore Serbe, pak para hapjes së ekspozitës “Ephemeris – trashëgimia e Dejan Medakoviq”, raporton Dnevnik i Nova TV përcjell Dukagjini.
Në një deklaratë zyrtare, Policia e Zagrebit konfirmoi se, pas përfundimit të hetimit penal, ka dorëzuar aktakuzat përmes procedurave të rregullta ndaj tetë personave – katër të miturve dhe katër të rriturve të moshave 18, 20, 23 dhe 27 vjeç. Ata akuzohen për shkelje sipas neneve 5 dhe 13 të Ligjit për Veprat Kundër Rendit dhe Qetësisë Publike.
Sipas policisë, autorët kishin fshehur identitetin duke veshur rroba të errëta me kapuç dhe duke mbuluar fytyrën, gjë që shkaktoi shqetësim dhe pasiguri te qytetarët që ndodheshin në vendin publik, si edhe te ata që e panë incidentin përmes mediave.
Në deklaratë thuhet gjithashtu se dy nga personat e përfshirë janë të njohur më herët për veprime të paligjshme: një 27-vjeçar i regjistruar për shtatë vepra penale dhe katër kundërvajtje, si dhe një i mitur 16-vjeçar i regjistruar për dy kundërvajtje.
Policia komentoi edhe për përleshjen e rëndë të ndodhur më 12 nëntor në sheshin Ban Josip Jelaçiq. Deri tani janë ngritur kallëzime penale ndaj tre të miturve për veprën “Shkaktimi i trazirave” sipas nenit 324, paragrafi 2 të Kodit Penal. Të tre të miturit u dërguan në mbikëqyrje të paraburgimit më 13 nëntor 2025, ndërsa hetimet vazhdojnë për identifikimin e pjesëmarrësve të tjerë. Njëri prej tyre është regjistruar edhe më parë për vepra penale.