Një statujë rreth 1,800-vjeçare është zbuluar në qytetin antik të Blaundos, në provincën perëndimore Usak të Turqisë, kanë bërë të ditur arkeologët të premten.
Artefakti u gjet gjatë gërmimeve në stadiumin 2,000-vjeçar të qytetit, i cili mendohet të jetë ndërtuar nga ushtarët maqedonas të vendosur në këtë zonë gjatë fushatës anadollake të Aleksandrit të Madh.
Sipas ekipit arkeologjik, statuja ishte e ngulitur në murin e stadiumit, me pamje nga lugina e thellë e krijuar nga Kanioni Ulubey. Ajo është pa kokë, krahë dhe këmbë, dhe është transferuar menjëherë në Muzeun Usak për ruajtje.
Shefi i gërmimeve dhe drejtori i muzeut, Şerif Söyler, tha për agjencinë Anadolu se statuja përfaqëson një figurë mashkullore, është 87 centimetra e lartë dhe 47 centimetra e gjerë.
“Është një torso e punuar në mënyrë shumë të rafinuar, të cilën paraprakisht e datojmë në shekullin II të erës sonë,” tha ai, duke shpjeguar se statuja ishte ripërdorur si material mbushës gjatë periudhës bizantine, gjë që bëri të mundur ruajtjen e saj natyrale brenda murit.