Presidenti i Ukrainës, Volodymyr Zelensky, ka mirëpritur marrëveshjen për armëpushim mes Shteteve të Bashkuara dhe Iranit, duke deklaruar se edhe Kievi është i gatshëm të “përgjigjet në të njëjtën mënyrë” nëse Moska ndalon sulmet.
“Ukraina gjithmonë ka bërë thirrje për armëpushim në luftën e zhvilluar nga Rusia kundër shtetit dhe popullit tonë në Evropë, dhe ne mbështesim armëpushimin në Lindjen e Mesme dhe Gjirin, i cili hap rrugën për përpjekje diplomatike,” shkroi ai në rrjetin social X.
Zelensky theksoi se një armëpushim krijon parakushtet e duhura për arritjen e marrëveshjeve, shkruan Reuters, transmeton Dukagjini.
Më herët, Ukraina kishte përgëzuar vendosmërinë e SHBA-së për sulmet ndaj Iranit, i cili është një aleat i afërt i Rusisë dhe ka furnizuar mijëra dronë që janë përdorur në sulmet kundër Ukrainës.
Kievi ka kërkuar vazhdimisht nga Moska që të pranojë një armëpushim të plotë në luftën katërvjeçare, në mënyrë që të hapet rruga për negociata paqeje. Nga ana tjetër, Rusia ka deklaruar se dëshiron që kushtet e një marrëveshjeje gjithëpërfshirëse të përcaktohen para se të ndalojë luftimet.
Ndërkohë, Ukraina ka dërguar mbi 200 specialistë në Lindjen e Mesme për të ndihmuar në kundërpërgjigjen ndaj sulmeve me dronë iranianë.
“Ekipet ushtarake ukrainase do të vazhdojnë të punojnë në rajon për të ndihmuar në zhvillimin e mëtejshëm të kapaciteteve të sigurisë,” tha Zelensky.