Presidenti i Ukrainës, Volodymyr Zelensky, ka deklaruar se sulmet e kryera gjatë natës në rajonin e Zaporizhzhias janë kryer me raketa balistike të prodhuara në Korenë e Veriut.
Në një reagim në rrjetin social X, Zelensky e cilësoi sulmin si një “sulm brutal”, i cili, sipas tij, ishte planifikuar për të shkaktuar dëme maksimale në infrastrukturën civile.
Nga sulmet në rajon raportohet se gjashtë persona kanë humbur jetën, ndërsa 19 të tjerë janë plagosur.
Zelensky tha gjithashtu se në Kiev një sulm ka dëmtuar një spital të sëmundjeve infektive. Ndërkohë, sipas tij, sulmet ndaj nënstacioneve elektrike në Kherson dhe Kharkiv kanë shkaktuar ndërprerje të energjisë elektrike.
Presidenti ukrainas paralajmëroi se veprimet e fundit të Rusisë tregojnë për përshkallëzim të mëtejshëm të luftës.
“Çdo hap që ndërmerr Rusia – rritja e prodhimit të raketave balistike, sjellja e pajisjeve nga Koreja e Veriut dhe përgatitjet për mobilizim – tregon se Moska po përgatitet jo për paqe, por për përshkallëzim”, deklaroi Zelensky.
Ai u bëri thirrje aleatëve të Ukrainës që të përgjigjen me sanksione të reja ndaj Rusisë dhe me forcimin e mbrojtjes ajrore të Ukrainës.