Deputeti i LDK-së, Armend Zemaj, e ka kritikuar ministrin e Shëndetësisë, Rifat Latifi, për mënyrën se si po e menaxhon sektorin e shëndetësisë.
Në një intervistë për EO, ish-ministri i Shëndetësisë ka thënë se përfshirja e kryeministrit të Kosovës në komisione për shëndetësi është tentim për t’i mbuluar dështimet në këtë sektor.
Zemaj i ka përmendur disa nga problemet më të mëdha në shëndetësi, siç janë mungesa e shërbimeve efikase, mungesa e barnave dhe mungesa e shpenzimit të materialit shpenzues.
“Kanë qenë shumë probleme të njohura deri më tani si mungesa e shërbimeve efikase, mungesa e barnave, mungesa e shpenzimit të materialit shpenzues. Paaftësia për t’u marrë me sektorin e shëndetësisë dhe involvimi i kryeministrit për të mbuluar këto dështime përmes njerëzve të njëjtë dhe është vetëm shtyrje kohe, në dëm të pacientëve dhe qytetarëve të Kosovës. Kjo qasje është e dëmshme, këto veprime nuk derivojnë sukses. Targën e çmimit negativ po e paguajmë të gjithë ne edhe me këtë Qeveri dhe tretmanin çfarë po i bëhet sektorit të shëndetësisë”, ka thëna Zemaj.
Ai e ka kritikuar kryeministrin Kurti, duke thënë se ka emëruar ministra të paaftë.
“Problemi qëndron te Qeveri Kurti sepse ai ka mandatuar ministra të paaftë dhe tash po tenton të mbulojë dështime të tyre. Problemi është që kjo Qeveri e ka marrë mandatin pa program në sektorin e shëndetësisë”, është shprehur Zemaj.
Zemaj ka thënë se ministri Latifi është duke i detektuar problemet, por sipas tij, nuk është duke u zgjidhur ato.
“Paaftësia qeverisëse, kapaciteti i vogël menaxherial, implikmi në pozita kyçe të militantëve politikë, të cilët nuk kanë përvojë menaxheriale është treguar që gjendja në shëndetësi është shumë e rënduar dhe pengesat që iu bëhen pacientëve, aparatura që nuk punojnë se qajnë kokën as ministri as Qeveria. Krejt çka bëjnë i detektojnë problemet dhe fare nuk merren me to”, ka thënë Zemaj.
Sa i përket listave të pritjes, deputeti Zemaj shtoi se duhet të kategorizohen sepse rastet emergjente “nuk presin”. Në anën tjetër, ai e theksoi mungesën e anesteziologëve dhe mjekëve.