Deputeti i Lidhjes Demokratike të Kosovës (LDK), Armend Zemaj, ka deklaruar se pa një marrëveshje politike nuk mund të ketë zgjidhje për situatën aktuale politike në vend.
Para nisjes së vazhdimit të 16-të të seancës konstituive të Kuvendit të Kosovës, Zemaj ka theksuar se zgjedhja e kryetarit të Kuvendit dhe formimi i qeverisë së re nuk mund të ndodhin pa një dakordim ndërmjet partive.
“Është me rëndësi të potencohet se pa marrëveshje politike nuk ka zgjedhje as të kryetarit të Kuvendit, as të qeverisë së re. Roli i presidentes është i përcaktuar me Kushtetutë dhe me ligj në formimin e institucioneve të reja të Kosovës”, u shpreh ai, transmeton EO.
Zemaj ka theksuar se LDK-ja ka ofruar një zgjidhje kalimtare për tejkalimin e ngërçit politik, me qëllim të formimit të institucioneve, por paralajmëroi për rrezikun e kapjes së Kuvendit si institucion.