Kryetari i Zubin Potokut, Izmir Zeqiri, ka thënë se disa deklarata dhe qëndrime të tij në një intervistë për KosovaPress-in i janë nxjerrë nga konteksti dhe janë keqinterpretuar.
Artikulli në të cilin ishte prononcuar Zeqiri thuhej se i njëjti kishte mbështetur veprimet e kryeministrit Kurti dhe s’do të jepte dorëheqje edhe nëse i kërkon PDK-ja.
Zeqiri ka thënë se e respekton mandatin, obligimet dhe përgjegjësitë që ka, por sipas tij, interesi i Kosovës është mbi të gjitha.
“Prandaj, qëndrimet e PDK-së, të Kryetarit Memli Krasniqi si dhe vendimet e Këshillit Drejtues më 3 korrik, ku isha pjesëmarrës edhe unë, janë udhërrëfyes dhe bazament i qëndrimeve mbi të cilat do të veproj edhe në të ardhmen. Nuk kam asnjë dallim nga ai vizion dhe nga ato qëndrime”, ka shkruar Zeqiri, duke shtuar se do të vazhdojë koordinimin me kreun e PDK-së, Memli Krasniqi.
Kryetari i Zubin Potokut ka shtuar se veprimet e kësaj partie do të jenë të konsultuara me partnerët ndërkombëtarë “sepse përshkallëzimi në pjesën veriore të Kosovës është në kundërshtim me interesin e shtetit tonë, prandaj, ne jemi të gatshëm të kontribuojmë për de-përshkallëzim të gjendjes, duke përfshirë edhe mbajtjen e zgjedhjeve të reja në këto komuna, në momentin kur një gjë e tillë është e mundshme”.
Tutje, Zeqiri është shprehur se dorëheqja e tij nga posti i kryetarit të Zubin Potokut nuk do ta zgjidhte situatën e krijuar.