Zëvendësministri i Punëve të Jashtme dhe Diasporës, Kreshnik Ahmeti, ka pritur në takim ambasadorin e ri të Republikës së Turqisë në Republikën e Kosovës, Sabri Tunc Angili.

Në këtë takim zëvendësministri Ahmeti e ka uruar ambasadorin Angili për detyrën e re dhe i ka shprehur mirënjohje për bashkëpunimin e vazhdueshëm në mes të dyja vendeve.

“Gjithashtu, zëvendësministri Ahmeti shprehi ngushëllimet më të thella për viktimat e tërmeteve që kanë goditur Turqinë. Duke theksuar se Kosova i ka qëndruar pranë popullit turk në këto momente të vështira”, njofton Ministria e Punëve të Jashtme dhe Diasporës.

Pamje nga takimi

Në takimin e zëvendësministrit Ahmeti dhe ambasadorit Angili është diskutuar për zhvillimin e mëtutjeshëm të raporteve të shkëlqyeshme bilaterale.

“U diskutua mbi organizimin e konsultimeve të dyta politike, thellimin e bashkëpunimit në fushën e ekonomisë dhe të sigurisë”, thuhet në njoftimin e MPJD-së.

Ambasadori Angili është shprehur falënderues për mikpritjen në Kosovë.