Zëvendësministri i Punëve të Jashtme dhe diasporës, Kreshnik Ahmeti, në kuadër të konsultimeve politike, ka pritur në takim delegacionin nga Ministria për Evropë dhe Punë të Jashtme të Sllovenisë, të kryesuar nga sekretar i shtetit, Marko Štucin.
Ahmeti thotë që diskutuan për thellimin e bashkëpunimit mes të dyja shteteve në fushat e ekonomisë, drejtësisë dhe sigurisë.
“Pas akreditimit nga autoritetet sllovene të atasheut të mbrojtjes të Kosovës për Slloveninë, dy Republikat tona do të kenë bashkëpunim edhe më intensiv në fushën e mbrojtjes”, – shkroi Ahmeti në faqen e tij në Facebook.
Ahmeti shkruan që ka falënderuar shtetin slloven për mbështetjen që i ka ofruar shtetit të Kosovës në liberalizimin e vizave, procesin e anëtarësimit në Këshillin e Evropës dhe mbështetjen për procesin e integrimit në Bashkimin Evropian.