Zëvendësministrja e Ministrisë së Punëve të Jashtme dhe Diasporës, Liza Gashi, në kuadër të vizitës së punës në Çeki, ka zhvilluar takime të veçanta me përfaqësues të institucioneve çeke.
Zëvendësministrja Gashi, në takim me homologun e saj, Jan Marian, ka diskutuar për marrëdhëniet bilaterale dhe bashkëpunimin ndërmjet Kosovës dhe Çekisë, si dhe mundësitë e thellimit të këtij bashkëpunimi në fusha me interes të përbashkët. Gashi e ka falënderuar Republikën e Çekisë për mbështetjen e vazhdueshme në proceset e ndërlidhura me integrimin euroatlantik të Kosovës.
“Ndërkaq, në takimin me të dërguarin e posaçëm për çekët që jetojnë jashtë vendit, z. Jari Kratky, zëvendësministrja Gashi është njoftuar për politikat e institucionit lidhur me adresimin, menaxhimin e problemeve dhe sfidave që dalin nga bashkëpunimi me diasporën e tyre dhe zhvillimin e politikave efektive për angazhimin e diasporës. U theksua rëndësia e ndarjes së përvojave, me qëllim të thellimit të bashkëpunimit në fushën e diasporës dhe programeve edukative dhe kulturore”, thuhet në njoftim.
Po ashtu, zëvendësministrja Gashi ka zhvilluar një takim me drejtorin ekzekutiv nga Shoqata për Investime të Huaja, Ondrej Votruba, ku fokusi kryesor i diskutimeve ishin investimet që lidhen me infrastrukturën, energjinë dhe turizmin.
Votruba është njoftuar për mjedisin e favorshëm që Kosova ofron për investitorët e huaj dhe për potencialin ekonomik e zhvillimor që ka Kosova.