Drejtori i “Syri i Vizionit”, Veton Mujaj, vlerëson se fushata e zgjedhjeve të parakohshme ka qenë më e mirë dhe më e butë në gjuhë sesa zgjedhjet e kaluara.
Mujaj, në “FIVE” në Dukagjin, u shpreh se gjuha e përdorur në zgjedhjet e 9 shkurtit ishte më e ashpër sesa tani.
“Kemi parë që kemi të bëjmë me një fushatë më të shkurtër dhe fokusi i politikanëve kaloi kryesisht në rrjetet sociale kryesisht e pastaj në takime të mëdha dhe komuna të mëdha kryesisht dhe nuk patën kohë të shkojnë derë më derë sikur kur fushata është më e gjatë, Fushata ishte e mirë dhe jo shumë të egër siç e kemi pasur në zgjedhjet në muaji shkurt, zërat prej VV-së ishin zbutur ndërkaq nga disa parti të tjera ishin rritur paksa. Po përmbyllet pak më butë sesa në shkurt dhe të shohim se si do të jetë në bazë të rezultateve të ditës së diel”, u shpreh Mujaj.
Mujaj, mes tjerash, vlerëson se gjuha e zbutur nga pozita ka qenë sipas tij për shkak të mundësisë së krijimit të koalicioneve pas rezultateve të së dielës.
“Kemi pasur më pak raste dhe më pak kandidat që e kanë humbur vetën dhe kanë përdorur gjuhë më të vështirë, mbase atmosfera e përgjithshme se nuk do të duhej të irritoheshin qytetarët – gjuha mund të jetë zbutur edhe për mundësinë e një bashkëpunimi pas zgjedhjeve varësisht nga rezultatet e së dielës”, u shpreh Mujaj.
Mujaj, tutje, uron që shqetësimi i ngritur për mundësinë e ndërprerjes elektrike të mos ndodhë, pasi u shpreh se do të krijonte shumë vështirësi.