Dy muaj pas suspendimit, katër zyrtarët e Institutit të Mjekësisë Ligjore, janë rikthyer përsëri në vendet e tyre të punës.
Zyrtarët Flutura Goga, Nardi Sheqergjiu, Anila Lakna dhe Ilirjana Shala, u suspenduan nën arsyet e shkeljeve të rënda disiplinore, që ndërlidhen me zhdukjen e mostrave në rastin e Astrit Deharit.
Televizioni Dukagjini mëson se të katër zyrtarët ka rreth dy javë që kanë nisur të dalin përsëri në punë.
Vendimin e ka marrë komisioni i ankesave, që drejtohet nga Valdete Ejupi.
Ushtruesi i detyrës së drejtorit në IML, Ditor Haliti, nuk iu është përgjigjur pyetjeve të televizionit në lidhje me këtë çështje.
E këshilltari për media i Ministres Haxhiu, Flamur Pireva, ka thënë se nuk kanë kompetencë të komentojnë vendimet e komisionit.
“Legjislacioni në fuqi nuk i jep kompetencën Ministres apo kabinetit lidhur me rastet e tilla. Të dy komisionet kanë pavarësi në vendimarrje. Siç jeni në dijeni, në rastin e zhdukjes së mostrave në laboratorin e toksikologjisë, Ministrja Haxhiu, ka njoftuar prokurorin dhe ka kërkuar nga drejtori i IML që konform ligjit dhe përgjegjësisë të ndërmarrë veprime në lidhje me rastin. Pavarësisht ndjeshmërisë së rastit, si Ministri, nuk kemi asnjë kompetencë për kthimin apo mos kthimin e tyre në vendin e punës, pavarësisht që ne nuk pajtohemi me vendimin e tyre”, ka thënë Pireva.
Vet ministrja e drejtësisë, Albulena Haxhiu, e kishte bërë publik rastin në një konferencë për media.
Haxhiu më pas e kishte publikuar edhe vendimin e komisionit disiplinor për suspendimin e katër zyrtarëve.
Për rastin është duke zhvilluar hetime edhe Prokuroria Speciale e Kosovës.