Zjarr në një ndërtesë për punëtorë në Budapest, tre të vdekur dhe 22 të lënduar
Të paktën tre persona kanë humbur jetën dhe rreth 22 të tjerë janë lënduar pasi një ndërtesë, e përdorur si strehë e përkohshme për punëtorë, u përfshi nga zjarri në orët e hershme të së premtes në një periferi të kryeqytetit të Hungarisë, njoftuan autoritetet. Zjarrfikësit arritën të fiknin flakët në Budakeszi, sipas Drejtorisë Kombëtare […]
Të paktën tre persona kanë humbur jetën dhe rreth 22 të tjerë janë lënduar pasi një ndërtesë, e përdorur si strehë e përkohshme për punëtorë, u përfshi nga zjarri në orët e hershme të së premtes në një periferi të kryeqytetit të Hungarisë, njoftuan autoritetet.
Zjarrfikësit arritën të fiknin flakët në Budakeszi, sipas Drejtorisë Kombëtare të Hungarisë për Menaxhimin e Katastrofave, shkruan AP, transmeton Dukagjini.
Në vendngjarje u dërguan më shumë se 40 mjekë dhe 18 automjete emergjence.
Zjarrfikësit shpëtuan disa të mbijetuar dhe nxorën tre bombola gazi nga ndërtesa. Trupat e dy burrave dhe një gruaje u gjetën nën çatinë e shembur të ndërtesës, tha një zëdhënës i autoritetit të menaxhimit të katastrofave.
Gjatë një konference për media të premten, një zëdhënës i Policisë së Qarkut Pest tha se zjarri ka nisur nga shpërthimi i njërit prej dhomave. Ai shtoi se në ndërtesë janë gjetur disa parregullsi, përfshirë përdorimin e gazit jashtë standardeve të sigurisë.
Policia ka nisur një hetim penal për rastin.
Mjekët trajtuan 22 persona për plagët e marra gjatë zjarrit, përfshirë katër që janë në gjendje të rëndë.
Të lënduarit u transportuan në tetë spitale të Budapestit për trajtim të mëtejshëm.















