Temperaturat ekstreme që të hënën në Kosovë arritën deri në 37 gradë Celsius kanë shkaktuar disa vatra zjarri në komunën e Istogut, duke rrezikuar sipërfaqe të gjera toke dhe banesa në disa fshatra.
Fshatrat Kovragë, Veriq, Osojan, Gurrakoc dhe Llukafc i Thatë janë përfshirë nga flakët, të cilat janë përhapur me shpejtësi për shkak të thatësisë dhe erës.
Në pamje të siguruara nga Dukagjini, shihen qytetarët e zjarrfikësit duke ndërhyrë për të shuar zjarret.
Kryetari i Komunës së Istogut, Ilir Ferati, përmes një postimi në Facebook, e ka cilësuar gjendjen si “alarmante”, duke theksuar se kërkon vëmendje dhe kujdes maksimal nga të gjithë qytetarët.
“Së bashku me ekipet e zjarrfikësve, Policinë e Kosovës dhe institucionet përgjegjëse, jemi në terren dhe po punojmë me të gjitha kapacitetet tona për të lokalizuar dhe shuar vatrat e zjarrit, me qëllim që të parandalojmë përhapjen e tyre dhe të mbrojmë pronat, tokat bujqësore dhe sigurinë e banorëve tanë. Apeloj te çdo qytetar i Istogut që të tregojë kujdes maksimal, veçanërisht në zonat bujqësore dhe pyjore dhe të mos digjin barishta, mbeturina apo sende të tjera, pasi edhe një shkëndijë e vogël mund të shkaktojë dëme të mëdha dhe të pakthyeshme”, shkruan Ferati.
Ai u bëri thirrje të gjithë qytetarëve që të mos djegin barishta, mbeturina apo sende të tjera, pasi edhe një shkëndijë e vogël mund të shkaktojë dëme të mëdha dhe të pakthyeshme.