Paradita e së enjtes kishte qenë një tjetër ditë e zakonshme, por gjithçka ka ndryshuar në mbrëmje.
Pronarët e 12 bizneseve që kanë vepruar në hapësirat e Tregut të Gjelbër në kryeqytet, u ballafaquan me humbje të mëdha, shkaku i zjarri që shpërtheu aty.
Gjithçka është shndërruar në shkrumb e hi, por brenga e tyre është tek hapat tutje.
“Ne prej kësaj kemi mbijetese, ushqim, bukë krejt. Fëmijë të vegjel kemi në shtëpi e nuk di si do të ja bëjmë”, ka thënë pronarja e biznesit.
Vlera e dëmit, sipas një pronari tjetër, shkon në dhjetra mijëra euro.
Nuhi Krasniqi, pronar i biznesit ka thënë se “Kemi pësu dëm prej 34 mijë euro, ka pas dekorime, tesha kombëtare, ciftelia, sharkia, dekorime kombëtare në përgjegjësi edhe fetare”.
Detaje se çka kishte ndodhur natën e së enjtës dhanë edhe zjarrëfikësit e Prishtinës.
Abdusamed Shkodra nga zjarrëfikësit e Kosovës ka thënë se “Fatbadhësisht nuk ka pas dëme në njerëz apo të lënduar. Dëme materiale ka pasur, prej zjarrit janë përfshirë diku mbi 12 kiosqe apo lokale. Për dëme ne nuk kemi bërë, pritët të dal komisioni nga komuna”.
Mëngjesin e së premte, për të kuptuar shkaktarët e zjarrit në vendin e ngjarjes janë parë edhe pjesëtarë të Policisë së Kosovës, por nga KEDS, por që nuk janë dhënë detaje shtesë gjatë së premtes.
Në vendin e ngjarjes gjatë ditës u pa edhe kryetari i kryeqytetit, Përparim Rama, që u ka premtuar pronarëve se për ta do të gjendet një zgjidhje nga drejtoritë përkatëse.