Bordi i Zyrës së Rregullatorit të Energjisë (ZRrE), ka marrë vendim që ta shtyjë ekzekutimin e vendimit për shtrenjtim të energjisë elektrike.
Ky vendim erdhi pas aktvendimit të Gjykatë së Apelit, e cila vërtetoi vendimin e Themelores për bllokimin e tarifave të shtrenjtuara.
Kjo ka bërë që Operatori i Sistemit, Transmisionit dhe Tregut – KOSTT-i që të paralajmërojë reduktime të energjisë elektrike, për shkak të mos kapacitetit për sigurimin e saj.
Ndërkohë, Korporata Energjetike e Kosovës i ka thënë RTV Dukagjinit se po prodhon rrymë me kapacitete të plota, mjaftushem për të përmbushur kërkesat e konsumit vendor.
“KEK ju njofton se aktualisht është duke operuar sipas planit dhe bilancit energjetike me 4 njësi prodhuese (B-1, A-3, A-4 dhe A-5), me kapacitete të plota prej rreth 660 MË/h. duke përmbushur kërkesat e konsumit vendor” ka thënë Korporata Energjetike e Kosovës.
E njoftimi i KOSTT-it ka shqetësuar edhe partitë opozitare.
Deputeti nga radhët e PDK-së, Ferat Shala ka thënë se duhet sa më shpejtë të merret një vendim i ri nga ZRrE.
“Jemi urgjentinsht në kërkesë që vendimi i gjykatës të fillojë së zbatuari dhe ky vendim i gjykatës e fut ingranazhin e rregullatorit në lëvizje” ka thënë Shala.
Ndërkohë, Valentina Bunjaku nga LDK, fajin për këtë situatë e ka vënë te Qeveria Kurti.
“Qeveria e ka për obligim të i’u bëjë qytetarëve zgjidhjen për kthimin e mjeteve dhe e ka për obligim që ta subvencionoj kostin”
KOSTT ka paralajmëruar se nëse nuk ndërmerren veprime, do të rrezikohet seriozisht Marrëveshja e Kyçjes në rrjetin evropian të transmisionit të energjisë elektrike.