Jeton Zulfaj, këshilltar i kryeministrit të Kosovës, Albin Kurti, i ka quajtur të njëanshme dhe të padrejta masat e Bashkimit Evropian ndaj Kosovës.
Kështu është shprehur Zulfaj në emisionin “Five”, në RTV Dukagjini, ku ka theksuar se të njëjtat nuk përkojnë as me angazhimin dhe zhvillimin demokratik të Kosovës por as me situatën të cilën e kemi në terren.
“Po flasim për masat të cilat … Janë të njëanshme sepse kemi marrëdhënie kontraktuale me BE-në dhe jemi dy palë nënshkruese të MSA-së. Në lidhje me vlerat themelore të BE-së, rregullat dhe standardet Kosova nuk i ka shkelë asnjë. Masat janë të padrejta, nuk përkojnë as me angazhimin dhe zhvillimin demokratik të Kosovës por as me situatën të cilën e kemi në terren. Po flasim për një proces në të cilin kemi dhënë kontributin e jashtëzakonshëm që të kuptohet drejt pozicioni i Kosovës si palë e cila është e interesuar që të ketë normalizim të marrëdhënieve të plota me Serbinë”, ka thënë ai.
Zulfaj ka potencuar se Kosova është konstruktive, aktive në normalizim të plotë të marrëdhënieve dhe ajo që nuk mund të bëjë është koncesione në dëm të sovranitetit të shtetit
“Është fakt që ne kemi ofruar nënshkrimin e marrëveshjes dhe Serbia ka refuzuar. Pra të vendosësh masa ndaj një pale që po ofron nënshkrimin e marrëveshjes ndërkohë që pala tjetër refuzon, dhe që kemi edhe insistimin që të zbatojmë marrëveshjen si të plotë. Patjetër që kemi marrëveshje por procesi evident siç është për të gjithë, Kosova është konstruktive, aktive në normalizim të plotë të marrëdhënieve dhe ajo që nuk mund të bëjë është koncesione në dëm të sovranitetit të shtetit”.