Zvicra ka mposhtur Kanadanë 2:1 në Vancouver të mërkurën mbrëma, duke e mbyllur fazën e grupeve në vendin e parë të Grupit B me shtatë pikë.
Kanadaja përfundon e dyta me katër pikë, sa ka edhe Bosnjë e Hercegovina, por me gol-dallim më të mirë. Ndeshja direkte mes Kanadasë dhe Bosnjë e Hercegovinës është mbyllur 1:1.
Zvicra e nisi pjesën e dytë në mënyrë perfekte, kur Johan Manzambi asistoi vetëm 40 sekonda pas rifillimit të lojës për Ruben Vargas, i cili shënoi për 1:0. Vetë Manzambi e dyfishoi epërsinë në minutën e 57-të, duke shënuar golin e tretë të tij në këtë Botëror.
Kanadaja u kthye në lojë në minutën e 76-të, kur zëvendësuesi Promise David shënoi vetëm një minutë pas futjes në fushë.
Te Zvicra, kapiteni Granit Xhaka e përfundoi ndeshjen, por u ndëshkua me karton të verdhë në minutën e 32-të. Ndërsa Ardon Jashari mbeti në bankën rezervë.