Zyra e Bashkimit Evropian në Kosovë ka reaguar pas vendimit të fundit të Gjykatës Kushtetuese, duke kërkuar nga partitë politike që t’i përmbahen plotësisht këtij vendimi dhe të punojnë për zgjidhjen e ngërçit politik.
Në një postim publik, BE-ja thekson se Gjykata Kushtetuese ka dhënë sqarime të rëndësishme mbi procesin dhe se është e domosdoshme që të gjitha partitë e përfaqësuara në Kuvend të gjejnë kompromisin dhe shumicën e nevojshme për të vazhduar me zgjedhjen e Kryetarit të Kuvendit dhe Zëvendëskryetarëve.
“Gjykata Kushtetuese ka folur dhe ka dhënë sqarime të rëndësishme. BE-ja u bën thirrje të gjitha partive politike të përfaqësuara në Kuvendin e Kosovës që t’i përmbahen këtij vendimi dhe të gjejnë kompromisin dhe shumicën e nevojshme për të ecur me shpejtësi me procesin e zgjedhjes së Kryetarit të Kuvendit dhe Zëvendëskryetarëve. Nuk ka më kohë për të humbur në një ngërç politik”, thuhet në reagim.