Zyra e Presidentes së Republikës së Kosovës ka njoftuar se procedura për emërimin e anëtarëve të rinj të Komisionit Qendror të Zgjedhjeve (KQZ) ende nuk është përmbyllur.

Sipas njoftimit, pas pranimit të propozimeve me shkrim nga subjektet politike për kandidatët për anëtarë të KQZ-së, Zyra e Presidentes u është drejtuar institucioneve kompetente të sigurisë për verifikimin e tyre.

Afati pesëditor për verifikimin e kandidatëve ka përfunduar të premten, por procedura e emërimit nuk është finalizuar ende, pasi Zyra e Presidentes është në pritje të përgjigjeve nga institucionet kompetente.

Në njoftim thuhet se pas pranimit të përgjigjeve për verifikimet, Zyra e Presidentes do të ndërmarrë hapat e mëtejshëm për përmbylljen e procedurës së emërimit të anëtarëve të KQZ-së.