Zyrtarë amerikanë dhe rusë pritet të zhvillojnë bisedime të reja në Florida të shtunën, në përpjekjen më të fundit për t’i dhënë fund luftës së Rusisë në Ukrainë, ndërsa administrata e presidentit amerikan Donald Trump po përpiqet të nxjerrë një marrëveshje si nga Moska ashtu edhe nga Kievi.

Takimi vjen një ditë pas bisedimeve që SHBA zhvilloi të premten me përfaqësues ukrainas dhe evropianë, në kuadër të diskutimeve për një plan paqeje që ka nxitur shpresa të kufizuara për një zgjidhje të konfliktit, i cili nisi në shkurt 2022, kur Rusia ndërmori pushtimin e plotë të Ukrainës, shkruan Reuters, transmeton Dukagjini.

Delegacionin rus do ta drejtojë Kirill Dmitriev, i dërguari i posaçëm i presidentit Vladimir Putin, i cili do të takohet me Steve Witkoff, biznesmen i pasurive të paluajtshme i kthyer në diplomat, si dhe me Jared Kushner, dhëndrin e presidentit Trump. Marco Rubio, sekretari amerikan i Shtetit dhe këshilltari për sigurinë kombëtare, tha se mund t’u bashkohet gjithashtu bisedimeve.

Takime të mëparshme janë zhvilluar në klubin e golfit të Witkoff në Hallandale Beach, pranë Miamit.

Zyrtarë amerikanë, ukrainas dhe evropianë kanë raportuar këtë javë për përparim në çështjen e garancive të sigurisë për Kievin, si pjesë e negociatave për përfundimin e luftës. Megjithatë, mbetet e paqartë nëse këto kushte do të pranohen nga Moska.

Një burim rus i tha agjencisë Reuters se është përjashtuar mundësia e një takimi mes Dmitrievit dhe negociatorëve ukrainas.

Putin nuk ofron kompromis

Raportet e inteligjencës amerikane vazhdojnë të paralajmërojnë se presidenti rus Vladimir Putin synon të pushtojë të gjithë Ukrainën, sipas burimeve të njohura me këto vlerësime, duke kundërshtuar deklaratat e disa zyrtarëve amerikanë se Moska është e gatshme për paqe.

Gjatë konferencës së tij vjetore për shtyp në Moskë, Putin nuk ofroi asnjë kompromis, duke theksuar se kushtet e Rusisë për përfundimin e luftës nuk kanë ndryshuar që nga qershori 2024. Ai kërkon që Ukraina të heqë dorë nga aspiratat për anëtarësim në NATO dhe të tërhiqet plotësisht nga katër rajone ukrainase që Rusia i pretendon si territor të saj.

Kievi ka deklaruar se nuk do të dorëzojë territore që forcat ruse nuk kanë arritur t’i pushtojnë në gati katër vite lufte.

Negociatori kryesor i Ukrainës, Rustem Umerov, tha se ekipet amerikane dhe evropiane zhvilluan bisedime të premten dhe ranë dakord të vazhdojnë përpjekjet e përbashkëta.

“U dakorduam me partnerët tanë amerikanë për hapat e mëtejshëm dhe për vazhdimin e punës sonë të përbashkët në të ardhmen e afërt,” shkroi Umerov në Telegram, duke shtuar se ka informuar presidentin Volodymyr Zelensky për rezultatet e bisedimeve.

Shtëpia e Bardhë nuk iu përgjigj menjëherë një kërkese për koment.

Marco Rubio u tha gazetarëve të premten se është shënuar përparim, por se ende ka rrugë për të bërë.

“Në fund, u takon atyre të bëjnë një marrëveshje. Ne nuk mund ta detyrojmë Ukrainën të pranojë një marrëveshje. Nuk mund ta detyrojmë Rusinë të pranojë një marrëveshje. Ata duhet ta duan një marrëveshje,” tha Rubio.

“Roli ynë është të kuptojmë nëse ka ndonjë pikë të përbashkët ku ata mund të bien dakord. Kjo është ajo ku kemi investuar shumë kohë dhe energji. Mund të mos jetë e mundur, por shpresoj që po. Shpresoj që të arrihet këtë muaj, para fundit të vitit,” shtoi ai.