Zëvendëssekretari i Përgjithshëm i NATO-s, Mircea Geoana, gjatë qëndrimit në Kosovë, është takuar me presidenten e vendit, Vjosa Osmani, kryetarin e Listës Serbe, Goran Rakiq, gjithashtu është takuar edhe me komandantin e KFOR-it.
Me presidentën Osmani, Geoana ka biseduar rreth anëtarësimit në Programin e Partneritetit për Paqe dhe anëtarësimin në NATO.
Për portalin KoSSev, ai ka thënë se situata është e brishtë, por stabile, dhe se NATO nuk sheh asnjë shenjë rreziku që ajo mund të përshkallëzohet, ndërmjet Kosovës dhe Serbisë.
Ai ka shtuar se KFOR-i i përmbahet në mënyrë rigoroze mandatit të Rezolutës 1244 të Këshillit të Sigurimit të OKB-së. Sipas tij, Forcat e Sigurisë së Kosovës (FSK) nuk duhet të shkojnë në veri pa u konsultuar paraprakisht me komandantin e KFOR-it.
“Kur bëhet fjalë për Forcat e Sigurisë së Kosovës, ne gjithmonë themi se të gjithë duhet t’i përmbahemi Rezolutës 1244 të KS të OKB-së, e cila thotë shumë qartë se çdo lëvizje e mundshme drejt veriut nuk duhet të bëhet pa u konsultuar me komandantin e KFOR-it. Dhe ky është mesazhi që u dërguam të gjithë vendimmarrësve në Prishtinë, të cilët i vizituam sot”, ka thënë Geoana.
Gjithashtu, ai ka thënë se mesazhi i tij, dhe i të gjithëve nga NATO, për të dyja palët është inkurajimi i dialogut.
“Kjo është arsyeja pse mesazhi im dhe mesazhi i të gjithë neve nga NATO-ja për të gjitha palët, është se ne inkurajojmë dialogun dhe se dialogu dhe kompromisi nuk ka zëvendësim dhe se duhet të shmangim çdo vendim të papritur që mund të shkaktojë destabilitet. ”, ka shtuar Geoana.