Një zyrtar i lartë i administratës Biden, të premten e 20 janarit, ka thënë se zyrtarët e lartë amerikanë janë duke këshilluar Ukrainën që të ndalojë fillimin e një ofensive të madhe kundër forcave ruse derisa të vendoset furnizimi i fundit i armatimit amerikan dhe të sigurohet trajnimi.
Duke folur para një grupi të vogël gazetarësh në kushte anonimiteti, zyrtari ka thënë se Shtetet e Bashkuara po mbaheshin në vendimin e tyre për të mos ofruar tanke Abrams në Ukrainë në këtë kohë, mes një polemike me Gjermaninë mbi tanket.
Zyrtari ka shtuar se bisedimet e SHBA-së me Ukrainën për çdo kundërofensivë kanë qenë në kontekstin e sigurimit që ukrainasit t’i kushtojnë kohë të mjaftueshme fillimisht stërvitjes mbi armatimin më të fundit të ofruar nga Shtetet e Bashkuara.
Ndërsa, Shtetet e Bashkuara, të enjten kanë njoftuar se do të dërgojnë qindra automjete të blinduara në Ukrainë për t’u përdorur në luftë.
Serhiy Haidai, guvernatori i rajonit të Luhansk të Ukrainës ka potencuar se gjatë kësaj kohe moti i keq i dimrit i ka penguar luftimet në vijat e frontit, megjithëse një goditje e ftohtë që ngrin dhe ngurtëson tokën mund t’i hapë rrugën secilës palë për të nisur një ofensivë me pajisje të rënda.
Tutje zyrtari ka potencuar se Shtetet e Bashkuara nuk planifikojnë në këtë moment të dërgojnë tanke Abrams në Ukrainë, sepse ato janë të kushtueshme dhe të vështira për t’u mirëmbajtur.
Ministri gjerman i Mbrojtjes, Boris Pistorius, ka mohuar të premten se Berlini po bllokonte në mënyrë të njëanshme dërgesën e tankeve kryesore të betejës Leopard në Ukrainë, por ka shtuar se qeveria ishte gati të lëvizte shpejt për t’i dërguar ato nëse kishte konsensus midis aleatëve, raporton euronews.