Policia e Kosovës ka njoftuar se sot rreth orës 18:20 tek pala serbe në stacionin policor kufitar në Merdar është vërejtur një Land-Rover, me targa serbe e që dyshohet të jetë e xhandarmërisë serbe.
Policia përmes një postimi në “Facebook” njoftoi se kanë qenë prezent katër pjesëtar të xhandarmërisë serbe ku kanë qëndruar afërsisht dhjetë minuta. Dhe sipas Policisë, kur janë larguar xhandarmëria serbe ka shkelur vijën kufitare që bën shkelje të marrëveshjes për IBM-në nga ana e Serbisë si dhe provokim apo krijim i ndonjë incidenti ndërshtetëror.
“Më datë 14.10.2024, rreth orës 18:20, tek pala serbe në stacionin policor kufitar në Merdar është vërejtur një veturë e tipit Land-Rover me targa të Serbisë që dyshohej të jetë e xhandarmërisë serbe!Sipas informacioneve nga kompetentët aty shiheshin 4 (katër) pjesëtarë të xhandarmërisë serbe të cilët kanë qëndruar rreth 10 (dhjetë) minuta tek hyrja e objektit te pala serbe.Të njëjtit janë larguar duke shkelur vijën ndarëse kufitare që në fakt përbënë shkelje të marrëveshjes për IBM-në, ka për qëllim provokimin apo krijimin e ndonjë incidenti ndërshtetëror”, thuhet në njoftim.
Policia e Kosovës kërkon nga autoritetet relevante ndërkombëtare që të ndërmarrin veprime të nevojshme për ruajtjen e stabilitetit dhe respektimin reciprok të marrëveshjeve qe ndërlidhen me menaxhimin e integruar kufitar dhe me sigurinë në përgjithësi.
“Policia e Kosovës është duke kryer detyrat e saj ligjore në funksion të ruajtjes së qetësisë, stabilitetit dhe menaxhimin profesional të kufijve shtetëror në bazë të mandatit të saj Kushtetues dhe duke respektuar marrëveshjet ndërkombëtare për menaxhim të integruar kufitar, përderisa mbetet e përkushtuar në ruajtjen e sovranitetit dhe do të reagoj me profesionalizëm ndaj çdo akti kundërligjor, kundër kushtetues apo që cenon marrëveshjet ndërkombëtare për menaxhim kufitar”, thuhet në komunikatë.