Kryetarja e Parlamentit të Shqipërisë Lindita Nikolla, ka njoftuar se Bajram Begaj do të betohet si President, të dielën në orën 18:00.
Lajmi u bë i ditur nga vetë Kryetarja e cila urdhëroi mbledhjen e Kuvendit në seancë plenare të dielën e 24 korrikut.
Pas Betimit në Kuvend në orën 19:00 do të bëhet edhe pritja zyrtare në Pallatin e Brigadave nga Presidenti i ri i Shqipërisë Bajram Begaj.
Bajram Begaj u zgjodh president nga Kuvendi më 6 qershor me 78 vota pro si Presidenti i tetë i Republikës së Shqipërisë.
Gjeneralmajor Bajram Begaj ka lindur më datë 20 mars 1967 në Rrogozhinë. Në vitin 1989, ai ka përfunduar studimet pranë Universitetit të Tiranës, Fakulteti i Mjekësisë, dega Mjekësi e Përgjithshme dhe është titulluar oficer aktiv në specialitetin “Mjekësi” në vitin 1998.
Përpara se të merrte detyrën e shefit të Shtabit të Përgjithshëm, Begaj për një periudhë trevjeçare, ka shërbyer në detyrën e komandantit të Komandës së Doktrinës dhe Stërvitjes.
Gjatë karrierës së tij ushtarake, Begaj ka shërbyer në pozicione të ndryshme drejtuese në Forcat e Armatosura, si zëvendësdrejtor i Qendrës Spitalore Universitare “Nënë Tereza”, drejtor i përgjithshëm i Spitalit Ushtarak Qendror Universitar.
Ndërkaq, ai ka shërbyer gjithashtu si drejtor i Inspektoratit Shëndetësor, kryeinspektor dhe këshilltar i Inspektoratit Shëndetësor në Shtabin e Përgjithshëm të FA, shef i Njësisë Mjekësore Ushtarake dhe zëvendësdrejtor i Spitalit Universitar të Traumës, si dhe detyra të tjera në strukturat e Forcave të Armatosura.
Gjeneralmajor Begaj ka ndjekur kualifikime dhe specializime të ndryshme në fushën ushtarake dhe atë mjekësore, në institucionet arsimore brenda dhe jashtë vendit.
Ai ka përfunduar Kursin e Lartë për Sigurinë dhe Mbrojtjen pranë Akademisë së Forcave të Armatosura, Shkollën e Thelluar Pasuniversitare të Mjekësisë dhe specializimin pasuniversitar në profilin Gastrohepatologji, pranë Fakultetit të Mjekësisë Tiranë.
Gjithashtu, ka ndjekur kursin e menaxhimit spitalor dhe kursin e lidershipit mjekësor strategjik, në SHBA, Kursin e Lartë Ndërkombëtar të Menaxhimit të Mbrojtjes, pranë Institutit të Menaxhimit të Burimeve të Mbrojtjes në Shkollën Pasuniversitare të Marinës në SHBA, Seminarin e Lartë Ekzekutiv pranë Qendrës “Marshall”, Gjermani, si dhe kursin e Shëndetësisë, në Greqi.
Begaj, ka përfunduar “Doktoratën në Fushën e Mjekësisë”, pranë Fakultetit të Mjekësisë si dhe mban titullin “Profesor i Asociuar” në Mjekësi. Njëkohësisht është vlerësuar me medalje të ndryshme për arritje gjatë karrierës se tij ushtarake.