Përfaqësuesi i lartë i Bashkimit Evropian (BE) për Politikë të Jashtme e Siguri, Josep Borrell, do t’i njoftojë liderët e BE-së për situatën në veri të Kosovës.
Kështu ka bërë të ditur Borrell, teksa po mbahet dita e dytë e samitit të BE-së.
Kryediplomati evropian ka përmendur edhe mbështetjen që Këshilli i BE-së e rikonfirmoi për Ukrainën dje.
“Dje, ne rikonfirmuam mbështetjen tonë të palëkundur për Ukrainën dhe gatishmërinë për të ofruar angazhime të ardhshme të sigurisë. Sot, një diskutim i rëndësishëm për Kinën dhe sigurinë ekonomike. Do të informoj liderët për zhvillimet e fundit në veri të Kosovës”, ka shkruar Borrell në Twitter.
Yesterday at #EUCO, we reaffirmed our unwavering support to #Ukraine, and readiness to provide future security commitments.
Today, important discussion on China and economic security. I will debrief leaders on latest developments in the north of Kosovo. https://t.co/WOoaUb6UjQ
— Josep Borrell Fontelles (@JosepBorrellF) June 30, 2023
Në Bruksel është duke vazhduar samiti i liderëve të vendeve të Bashkimit Evropian, në të cilin, ndër tjerash temë për diskutim janë edhe tensionet në raportet ndërmjet Kosovës dhe Serbisë.
Për këtë është diskutuar edhe ditën e parë të samitit, së pari në një takim të përbashkët që liderët e BE-së patën me sekretarin e Përgjithshëm të NATO-s, Jens Stoltenberg, e pastaj edhe në takimin e shefave të shteteve apo qeverive të BE-së.
Ndryshe, dje, Borrell, ka thënë se do të kërkojë përkrahjen e shteteve anëtare të BE-së që të vazhdojnë presionin ndaj Kosovës dhe Serbisë, në mënyrë që të shmanget eskalimi i situatës.
Ai ka bërë thirrje për kthim në normalitet.
Po ashtu, Borrell ka theksuar se vendet anëtare të BE-së kanë vendosur për masa ekonomike dhe politike ndaj palëve, në mënyrë që ato të kontribuojnë në shtensionim të situatës.
Kjo sipas Borrell do të ketë kosto.
“Do t’i njoftoj liderët për gjithë punën time gjatë këtyre ditëve, dhe do t’u kërkojë mbështetjen e tyre që të vazhdojmë me presion në drejtim të palëve (Kosovës e Serbisë), në mënyrë që të shmangim eskalimin dhe t’i kthehemi normalitetit. Vendet anëtare kanë vendosur se duhet ndërmarrë masa, ekonomike e politike, në mënyrë që t’ua bëjmë të qartë se nëse nuk kontribuojnë në shtensionim, kjo do të ketë kosto”, u shpreh Borrell.
Ndryshe, tensionet në veriun e Kosovës, të banuar me shumicë serbe, nisën më 26 maj, kur kryetarët e rinj shqiptarë të Zveçanit, të Zubin Potokut dhe të Leposaviqit, hynë në ndërtesat komunale nën përcjelljen e Policisë së Kosovës.
Serbët kundërshtuan këtë dhe që atëherë po zhvillojnë protesta duke kërkuar tërheqjen e kryetarëve të rinj dhe të njësive speciale policore.
Bashkësia ndërkombëtare i ka paraqitur Kurtit tri kërkesa kryesore: qetësimin e situatës në veri, mbajtjen e zgjedhjeve të reja në katër komunat veriore dhe rikthimin në dialogun për normalizimin e raporteve Kosovë-Serbi.
Ndërkaq, nga Beogradi është kërkuar që të sigurojë që serbët të marrin pjesë pa kushte në zgjedhjet eventuale lokale.
Borrell: Do të ketë kosto nëse palët nuk kontribuojnë në shtensionim të situatës