Përmes një njoftimi në median sociale Facebook, kryeministri është shprehur se UÇK-ja i ka shkaktuar humbje të mëdhe okupatorit serbë, ndërsa këta të fundit janë hakmarrur në popullsinë civile duke vrarë dhe bërë masakra mbi dhjetëra persona.
Gjithashtu, Kurti ka përmendur edhe dëshmorët e rënë.
“Në historinë e Gjakovës dhe të Kosovës, përveç këtyre martirëve, duke i mbrojtur ata dhe vendin e tyre, në betejën e Çabratit ranë dëshmorë: Ahmet Gjikolli, Bujar Roka, Tom Gjoka, Kushtrim Hoxha, Dashmir Krasniqi, Visar Juniku, Sefedin Xërxa, Hamëz Zymberi, Agim Haxhiavdyli, Yllka Domi, Ilir Berisha, Taulant Nura, Ali Hoxha dhe Hazir Këpuska,” ka shkruar Kurti.
Sipas tij, qyteti i Gjakovës është një prej qyteteve që ka përjetuar shumë, ku aty është përjetuar dhunë intensive shtetërore, “më shumë se 300 burra e gra u paraburgosën duke u marrë nga rrugët e nga shtëpitë e tyre në Gjakovë në këtë periudhë.”
“Burrat u ndanë nga gratë e fëmijët dhe u çuan në lagjen Mulla Jusuf, ku u ndanë në dy grupe dhe u ekzekutuan. Rreth 50 civilë u vranë, e afër 50 të tjerë u rrëmbyen dhe zhdukën pa gjurmë. Ushtarë të UÇK-së, të cilët po mbronin civilët, gjithashtu ranë dëshmorë në këto luftime”, ka shkruar Kurti.
Ndër të tjerash, data 7 maj shënon 23 vjetorin e Betejës së Çabratit, e cila na përkujton qëndresën e popullit tonë.