Gjykata e Apelit ka vërtetuar dënimin me 24 vjet dhe 10 muaj burgim, ndaj Sylejman Ahmetit, i shpallur fajtor për vrasjen e shokut të tij, për një borxh prej 20 eurove.
Apeli ka hedhur poshtë ankesat e palëve, duke u arsyetuar se në aktgjykimin e Themelores në Prizren, nuk ka pasur shkelje.
“Gjykata e Apelit, vlerëson se pretendimet ankimore të cekura si më lartë nuk qëndrojnë, ngase aktgjykimi i ankimuar nuk përmban shkelje esenciale të dispozitave të procedurës penale të pretenduara me ankesa e as shkelje tjera të cilat kjo gjykatë i shqyrton edhe sipas detyrës zyrtare, të cilat kishin me kushtëzuar anulimin e aktgjykimit” thuhet në vlerësimin e Gjykatës së shkallës së dytë, që e posedon RTV Dukagjini.
Shaip Krasniqi, u vra në janar të vitit 2020, në një lokal në fshatin Maqitevë të Suharekës, ndërsa, Gjykata Themelore në Prizren shpalli aktgjykim dënues në gusht të vitit të kaluar ndaj Ahmetit.
Gjykata Themelore në Prizren, më 15 gusht të vitit 2022 e kishte dënuar me 24 vjet dhe 10 muaj burgim të akuzuarin, i cili e kishte vrarë shokun e tij për 20 euro borxh.
Aktakuza e ngritur nga Prokuroria Themelore në Prizren e ngarkon Sylejman Ahmetin se i njëjti e kishte privuar nga jeta tani të ndjerin Sh.K, më 26 janar 2020, në kafenenë “Toni” në fshatin Maqitevë të Komunës së Suharekës.