Kryetari i Kuvendit Komunal në Mitrovicën Veriore, Nedzat Ugljanin, ka bërë të ditur se këtë të premte është marrë vendimi për hapjen e urës mbi lumin Ibër për qarkullim të automjeteve dhe lëvizje të lirë.
Sipas tij, ky vendim ka ardhur me propozimin e delegates Aida Doli, për të cilën kanë qenë 13 vota pro, një kundër nga komuniteti serb dhe një abstenim nga komuniteti shqiptar që ka kërkuar shtyrjen e vendimit.
“Është vendim i kuvendit komunal. Ne kemi vendosur të veprojmë sipas standardeve evropiane për lëvizje të lirë. Po e shohim nga ana pozitive këtë”, ka deklaruar ai për Portalin Dukagjini.
Po ashtu, ai ka thënë se ata si kuvend komunal e kanë kryer obligimin e tyre, ndërsa organet përkatëse do të kujdesen për atë që është e realizueshme në aspektin e sigurisë.
Ai ka shtuar se vendimi do të shkojë në Ministrinë e Punëve të Brendshme, dhe se është në dorën e tyre të vazhdojë.
Ndaj vendimit për hapjen e qarkullimit të urës, e cila ka rreth 20 vjet që qëndron e mbyllur, ka reaguar Lista Serbe, e cila ka paralajmëruar se mundësia e hapjes do të ketë pasoja të mëdha, dhe sipas tyre, ky vendim shkel Marrëveshjen e Brukselit mes Kosovës dhe Serbisë.
“Lista Serbe dënon ashpër vendimin e kundërligjshëm dhe jolegjitim të shumicës së paligjshme dhe jolegjitime parlamentare në Mitrovicën e Veriut, për hapjen e urës kryesore të qytetit për qarkullimin motorik, gjë që shkel marrëveshjet e Brukselit dhe kërcënon drejtpërdrejt paqen në këtë zonë. Duam të paralajmërojmë se hapja e mundshme e urës padyshim që do të rezultojë me incidente në këtë zonë, gjë që duket se është edhe qëllimi i Prishtinës”, thuhet në reagimin e tyre.
Sipas tyre, ky vendim është i paligjshëm dhe i marrë nga “këshilltarë pa asnjë legjitimitet” mes qytetarëve që “do të ketë pasoja të mëdha për paqen, sigurinë dhe bashkëjetesën në këto zona”.
Lista Serbe ka kërkuar që KFOR-i, EULEX-i dhe përfaqësuesit e bashkësisë ndërkombëtare të pengojnë zbatimin e këtij vendimi, në mënyrë që, sipas tyre, “t’i lihet hapësirë zgjidhjes së çështjeve të hapura në dialog dhe në këtë mënyrë të ruhet paqja”.