Kryetari i Aleancës për Ardhmërinë e Kosovës (AAK), Ramush Haradinaj, pas anëtarësimit të Suedisë në NATO, ka thënë se shpresojnë që tani radhën e ka Kosova.
“Aleanca politiko-ushtarake – NATO, u forcua me anëtarësimin e Suedisë si anëtar i 32-të i saj. Shpresojmë se tani radhën e ka Kosova!”, ka shkruar Haradinaj.
Ndryshe, sot Suedia është bërë zyrtarisht anëtarja e 32-të e NATO-s pasi përfundoi procesin e anëtarësimit në Uashington.
Dorëzimi i dokumenteve u bë në një ceremoni dy vjet pasi Suedia aplikoi për t’u bashkuar me aleancën ushtarake pas pushtimit të plotë të Ukrainës nga Rusia.
Kryeministri suedez, Ulf Kristersson, ka deklaruar se “uniteti dhe solidariteti” do të jenë “dritat udhëzuese” të Suedisë.
Lexo më shumë: Suedia anëtarësohet zyrtarisht në NATO
Ndërsa, sekretari amerikan i Shtetit, Antony Blinken, ka thënë mes të tjerash se “gjërat e mira vijnë për ata që presin”.
“Aleanca jonë mbrojtëse është tani më e fortë dhe më e madhe sesa ka qenë ndonjëherë,” ka shtuar ai, duke falënderuar Suedinë për “rezistencën” e saj.