Nënkryetari i Kuvendit të Kosovës, Enver Hoxhaj, ka thënë se mbështetja amerikane dhe evropiane e unitetit politik mbipartiak e solli pavarësinë në Kosovë.
Ai këtë e ka bërë të ditur përmes një postimi në Facebook, ku ka treguar për ecurinë e takimit të dytë të “Ekipit të Unitetit”, takim ky të cilin e ka organizuar ambasadori amerikan në Kosovë, Jeff Hovenier.
“Mbështetja amerikane dhe evropiane e unitetit politik mbipartiak si përfaqësim i vullnetit të popullit, solli pavarësinë! Me ftesë të Ambasadorit Amerikan Jeffrey M. Hovenier, u takuam sërish bashkë, pjesëmarrësit në negociatat e Vjenës për pavarësinë e Kosovës për ta nderuar Kai Sauer, Nënsekretar i Shtetit për Politikë të Jashtme dhe Siguri i Finlandës”, ka shkruar Hoxhaj.
Mysafir në këtë takim ishte edhe ish-këshilltari i Ahtisaarit, tani Nënsekretar i Shtetit për Politikë të Jashtme dhe Siguri i Finlandës, Kai Sauer.
Ndryshe, të martën e pesë korrikut, Ambasadori i Shteteve të Bashkuara të Amerikës në Kosovë, Jeffrey Hovenier, mblodhi për drekë ish “Ekipin e Unitetit” të Kosovës, që ishin përfshirë në bisedimet e Vjenës 2006/2007” për statusin e Kosovës.
Ish presidenti Fatmir Sejdiu, Blerim Shala – këshilltar i ish presidentit Hashim Thaçi, Enver Hoxhaj – ish ministër i Punëve të jashtme, Ylber Hysa – ish ambasador i Kosovës në Maqedoninë e Veriut dhe ish kryeministri Agim Ceku janë disa nga personalitetet që ambasadori Hovenier i ftoi në drekë.
Të gjithë këta dhe të tjerët, ishin të përfshirë direkt në procesin e fazës para pavarësisë së Kosovë, në vitet 2005-2007, kur po diskutohej statusi final i Kosovës.
I ftuar ishte edhe Kai Sauer, nënsekretar i shtetit finlandez që në vitin 2006/7 ka shërbyer si këshilltar i Martti Ahtisarit, emisar i OKB-së në negociatat për statusin final të Kosovës.
Një gjë të tillë, e bëri të ditur ambasadori Hovenier, përmes llogarisë së tij në Twitter.
“Jam i lumtur që do të shtroj një drekë sot për Ambasadorin Kai Sauer, nënsekretarin e Shtetit – Politika e Jashtme dhe Siguri, të Ministrisë së Jashtme të Finlandës dhe anëtarët e ‘Ekipit të Unitetit’ të Kosovës. Ne diskutuam punën tonë kolektive të viteve 2006-07 dhe përkushtimin tonë për suksesin e vazhdueshëm të Kosovës”, ka shkruar Hovenier.
Delighted to host a lunch today for Ambassador Kai Sauer, Under-Secretary of State – Foreign & Security Policy @Ulkoministerio #Finland 🇫🇮 and members of Kosovo’s 'Unity Team.' We discussed our collective work in 2006-07 & our commitment to Kosovo’s continued success. pic.twitter.com/Ffo4nv1nJq
— Ambassador Jeff Hovenier (@USAmbKosovo) July 5, 2022
Një takim të ngjashëm, Hovenier e ka realizuar më 31 maj 2022.
Hovenier në vitin 1999 ishte pjesë e stafit të të dërguarit special të Organizatës së Kombeve të Bashkuara (OKB), Martti Ahtisaari, si dhe në angazhime të përkohshme në vendet fqinje si Serbi dhe Mal i Zi.
“Mirënjohës për pritjen e miqve të vjetër për një darkë ribashkimi të “Ekipit të Unitetit” të Kosovës, negociatorë në bisedimet e Vjenës 2006/2007”, kishte shkruar Hovenier.