Prokuroria Themelore në Gjakovë ka konfirmuar se i dyshuar për vrasjen në Gjakovë është ndaluar për 48 orë.
I dyshuari me inicialet Q.S. është arrestuar dhe, me vendim të prokurorit, brenda afatit ligjor pritet që ndaj tij të kërkohet masa e paraburgimit në gjykatën kompetente.
Prokuroria ka bërë të ditur se ka iniciuar rastin për veprën penale “vrasje”, sipas Kodit Penal të Republikës së Kosovës.
Viktima ka humbur jetën në Gjakovë pasi është sulmuar me mjet të mprehtë nga i dyshuari pas një mosmarrëveshjeje në orët e para të mëngjesit.
Fillimisht ai është dërguar për trajtim në QKMF, më pas është transferuar në Spitalin e Gjakovës, ku ka ndërruar jetë si pasojë e plagëve të rënda.
Sipas njoftimit të gjykatës, me vendim të Prokurorit të Shtetit, trupi i pajetë i viktimës është dërguar për obduksion në Institutin e Mjekësisë Ligjore (IML) në Prishtinë.