Kompania Kosovare për Distribuim me Energji Elektrike në Kosovë (KEDS) ka treguar se është tejkaluar situata e krizës me energji elektrike. Pas riparimit të Bllokut 2 dhe njësisë A3, më nuk do të ketë reduktime të energjisë.
Në komunikatën e KEDS-it thuhet se është stabilizuar situata e furnizimit me energji elektrike pas rikthimit të bllokut B2 dhe A3. “Njoftojmë konsumatorët se janë ndalur kufizimet e energjisë elektrike me hyrjen në prodhim të bllokut B2 dhe A3, pasi gjendja është stabilizuar për momentin”.
“Pavarësisht kësaj, kursimi është i domosdoshëm! Prandaj, ftojmë konsumatorët t’i bashkohen thirrjes sonë për kursim të energjisë, sepse çdo kilovat është i rëndësishëm të kursehet duke marrë parasysh krizën energjetike që ka kapluar gjithë botën”, ka shtuar KEDS.
“Në këto rrethana të vështira, ajo se çfarë na duhet është të jemi të bashkuar për tejkalimin e krizës. Bashkë ia dalim”.
Më tej, ata kanë theksuar se energjia elektrike duhet të përdoret racionalisht, sepse vetëm në këtë mënyrë kursehet energjia në këtë kohë krize.