Presidenti i Kinës Xi Jinping, në një takim partiak ka thënë që Kina kurrë nuk do të heqë dorë nga e drejta për të përdorur forcën mbi Tajvanin.
Kina e sheh Tajvanin e sunduar në mënyrë demokratike si territorin e saj, por qeveria e ishullit ka kundërshtime të forta dhe beson se sovraniteti duhet të pretendohet nga populli i saj.
Jinping duke folur në hapjen e kongresit të 20-të të Partisë Komuniste në pushtet e cila ishte ngjarja më e madhe politike e vendit, ka theksuar se Kina gjithmonë “respektonte, kujdesej dhe përfitonte” popullin e Tajvanit.
Ai ka shtuar se ishte i përkushtuar për promovimin e shkëmbimeve ekonomike dhe kulturore përgjatë ngushticës së Tajvanit.
“Zgjidhja e çështjes së Tajvanit është punë e vetë popullit kinez dhe i takon popullit kinez të vendosë”.
“Ne këmbëngulim të përpiqemi për perspektivën e ribashkimit paqësor me sinqeritetin më të madh dhe përpjekjet më të mira, por nuk do të premtojmë kurrë se do të heqim dorë nga përdorimi i forcës dhe do të rezervojmë mundësinë për të marrë të gjitha masat e nevojshme”, ka thënë presidenti i Kinës.
Gjatë fjalimit Jinping ka folur edhe për sigurinë, ai ka thënë se Kina do të përshpejtojë ndërtimin e një ushtrie të klasit botëror dhe do të forcojë aftësinë e saj për të ndërtuar një pengesë strategjike, raporton Sky News.
Në fund të kongresit njëjavor të Partisë Komuniste, Xi, 69 vjeç, pritet gjerësisht të fitojë një mandat të tretë lidershipi, duke forcuar vendin e tij si sundimtari më i fuqishëm i vendit që nga Mao Ce Duni.