Ushtruesi i detyrës së kryetarit të OVL të UÇK-së, Faton Klinaku, në një postim në llogarinë e tij në Facebook, ka shprehur keqardhje për ngjarjen e ndodhur të premten e 6 janarit, në Shtërpcë.
Ai ka theksuar se kërkon drejtësi pa anime politike, ndërsa të plagosurve u ka dëshiruar shërim të shpejtë.
“Shpreh keqardhje për atë që ndodhi në Shtërpcë, kërkoj drejtësi pa anime politike, e të plagosurve u dëshiroj shërim të shpejtë. Poshtë standardet e dyfishta”, ka shkruar Klinaku.
Ai postimet dhe reagimet e politikanëve, zyrtarëve dhe shoqërisë civile i ka quajtur vajtime gjykuese, pasi sipas tij, vendimi kryesor i takon Gjykatës së shkallës së prerë.
“A vajtuat mjaft o të mjerë politikanë e zyrtarë, shoqëri civile etj, vendorë e ndërkombëtarë, duke e bërë gjykimin ju! Interesant nga ju, nuk e folët asnjë fjalë për atë shqiptarin që e mbytën në burg të Serbisë, e bash për atë është dashur të merret politika e shtetit tonë dhe ndërkombëtarët, për t’i dërguar Serbisë edhe notë proteste. I quajtët edhe barrikadat me njerëz të armatosur në veri se janë protestues paqësorë”
“Me rastin në Shtërpcë natyrisht që merret shteti me organet e drejtësisë, që të zbardhet e vërteta se a i është zënë rruga pjesëtarit të FSK-së apo jo, se a e ka bërë aktin në vetëmbrojtje apo jo, dhe fajtori shpallet vetëm kur gjyqësia e shkallës së prerë e konstaton atë”, ka thënë Klinaku në postimin e tij.
Ndryshe, të premten e 6 janarit, dy të rinj, njëri 11 vjeç dhe tjetri 21, janë plagosur në Shtërpcë. I dyshuari është arrestuar më vonë atë ditë, dhe sipas deklarimit të ministrit të Mbrojtjes, Armend Mehaj, i dyshuari është pjesëtar i FSK-së.
Në shenjë revolte, komuniteti serb vendosi barrikada në Shtërpcë, të cilat u larguan po atë ditë.