Këshilli për Mbrojtjen e të Drejtave e të Lirive të Njeriut (KMDLNJ) ka thënë se nuk ka kushte për mbajtjen e zgjedhjeve në veri.
Sipas tyre, të gjitha partitë politike, me një konsensus duhet të kërkojnë që ato të mbahen në një kohë kur të plotësohen kushtet për mbajtje të zgjedhjeve të lira dhe të pakushtëzuara.
Ndër të tjera, KMDLNJ, ka thënë se që nga dita e shpalljes së këtyre zgjedhjeve u vunë në veprim strukturat paralele dhe paramilitare për të penguar këto zgjedhje përmes frikësimit të votuesve të mundshëm si dhe kandidatëve, përfaqësues të subjekteve politike apo kandidatë të pavarur të cilët u tërhoqën nga gara.
Ndër të tjera, ata kanë thënë se sidomos kohëve të fundit janë aktivizuar forcat që zbatojnë dhunë psikike dhe fizike ndaj atyre që kundërshtojnë Partinë Paramilitare Politike, Listën Serbe, e cila, në emër të ‘mbrojtjes’ së interesave të serbëve angazhohen të zbatojnë politikat destabilizuese të Serbisë në Kosovë.
“Është shpeshtuar hedhja e mjeteve plasëse që rrezikojnë, jetën, sigurinë dhe pronën e qytetarëve të atyre komunave me qëllim të krijimit të kushteve penguese për mbajtje të zgjedhjeve. Nëse të gjitha këto merren parasysh sikur që pjesa dërrmuese e votuesve të nacionalitetit serbë po i bojkotojnë këto zgjedhje KMDLNj e vlerëson se nuk ka kushte elementare të mbahen zgjedhjet e shpallura nga Presidentja e Kosovës”.
Sipas njoftimit të tyre, në zgjedhje votohet për të siguruar një përfaqësim politik që garanton plotësimin e kushteve dhe nevojave për qytetarët, pa iu kërcënuar liria e votës dhe pa u dhunuar vullneti i votuesit.
Ndërkaq, presidentja e Kosovës, Vjosa Osmani ka deklaruar se në dy-tre ditët e ardhshme do të sqarohet gjithçka lidhur me zgjedhjet në veri të vendit.
Të mërkurën, Ambasadori i ShBA-së në Kosovë, Jeff Hovenier kishte thënë se nuk ka kushte për të mbajtur zgjedhjet duke theksuar se siguria e qytetarëve duhet të jetë prioriteti më i lartë.
ShBA-ja thotë se s’ka kushte për mbajtjen e zgjedhjeve të planifikuara në veri